"Es isch mega chillig gsi!"

Sali mitenand :D Es isch mega chillig gsi! Bin det in Mels am warte gsi recht früeh sicher 1h bevor d'Prüefig ahgfange hät. Ich bin ebe nöd vo da (han sie us dringende Gründ da in Mels müsse mache). Uf jedefall hani d'Gägend zerst nochli durchfahre zum mir es Bild vom Verchehr z'mache. Dänn häts ahgfange, er isch cho, het mich begrüesst, han alli Dokument abgeh und er het de Töff no schnell ahgluegt. Denn hani de Parcour derfe mache :D Liebe das haha ( hans au viel güäbt). Er het zerst alles erchlährt und den ischs losgange. Grosse Slalom um öppe 6 Töggel, denn direkt is 8i paarmal rundume. Es riiiiise 8i ischs mer vorcho, extrem chillig. Ah ja ich fahre e Harley Sportster883. Nachene id Spuurgass. Tipp: du chasch im fall würkli Schritttempo fahre, muesch nöd so langsam dass muesch abstah, es langed vo de Ziit locker. Ähm ja denn hani no d Vollbremse müesse mache und das ischs au gsi. Er hät lächlend gseit isch guet gsi und het mich churz instruiert wie das jezte bim Fahre so ablauft. „Händ sie no frage? denn hani no e unklährti Frag beantworted becho und denn ischs los gange. Fröged mich nöd wo dure, kein Plan, uf jedefall sinds schöni Strasse gsi mit chli Kürvli, den mal e 30er Zone mit viel Rächtsvortritt. Imme Chreisel het mini Fuessraste chli gschliift bim eimal rundumefahre (er het gseit er will nöd das mer Fuessraste schliift). Hani mich churz entschuldigt und bin eifach wiitergfahre. Denn simmer uf d'Autobahn richtig Sargans das weisi no. Dete nach de Usfahrt hani wägem Verchehr nöd chöne gad inefahre. Han ahghalte und bim wägfahre hani eifach d Kuplig chli schnell cho lah und bin fascht chli is Mändli. Hani denkt "ups" und mich nomal entschuldigt haha. Es isch‘s 2. Mal gsi das öper hinde drufghocket isch. Ein Tag vorher s'erste Mal de Kolleg wo Prüefig bestande gha hät. Uf jedefall zruck zum Verchehrsamt, parkiert, er isch abgstiege und gseit er chömi gad wieder. Isch er cho und hett gseit:, Gratuliere sie hend bestande! Das mit em Schliife seg nöd so schlimm gsi wills kontroliert gsi isch. Alles in allem danke für de Expert, das schöne Wätter, mine Fähigkeite :D Mached eu nöd zviel Sorge die wönd eu nöd duregheie lah. Liebi Grüess de Harleycruser